اسكتش السُلطة صوت جهوري من الخارج : تعلن الهيئة القومية للحياة الأسرية عن الأشياء التي سيتم امتحان الأسر فيها لمعرفة من هي الأسرة المثالية ؟ أولاً السُلطة ............... يعني م الآخر كده : مين هو صاحب الكلمة في البيت ؟ (الأسرة بأكملها متجمعة حول ترابيزة ) الأب : الموضوع المرة دي واضح جداً و مش محتاج كلام و لامناقشات عن الأخذ و العطاء و الذي منه ..... كله مكتوب في الإنجيل .... الكلمة هي كلمة الراجل و الشورة شورته .... الأم : يا سلام .؟.... بقي الإنجيل بيقول الشورة شورة الراجل و الكلمة كلمته هاني : أيوة يا ماما ... في رسالة أفسس بتقول .. أيها الرجال أَخضعوا نساءكم نانسي : أخضعوا ايه يا بني انت هتألف في كلام ربنا .... الأية بتقول أحبوا نساءكم هاني (يهرش في شعره) : ممكن برضه .... بس فيه حاجه عن الخضوع برضه بتقول ان الست تخضع للراجل. الأب : وبالنسبة للمحبة دي حاجه طبيعية .... و لازم كلنا نحب بعضينا و انتوا عارفين انا بحبكوا و بأتعب عشانكم أد ايه ؟ الأم : مش عارفه ... انا حاسه ان الكلام ده فيه حاجه مش مظبوطة .... بس أنا مش عارفه ألاقيها ... ع العموم أنا ها ابقي أسأل القسيس الآيات دي إيه تفسيرها ؟ بس خلوا بالكم أن الكتاب كمان بيوصي الولاد يسمعوا كلام آبائهم ... هه .... يعني أنا ليَّ سُلطة عليكم إنتوا الإثنين نانسي : قصدك إيه يعني يا ماما ؟ الأب : الموضوع واضح يا نانسي ... مسابقة الأسرة المثالية ... اكيد تفوز فيها الأسرة اللي ترتيب السلطة فيها بحسب الكتاب المقدس ما بيقول .........الأب فوق و الأم تسمع كلامه و الولاد تحتهم و يسمعوا كلام الإتنين بابا و ماما نانسي : الكلام ده مش سليم ... كده ميبقاش فيه ديمقراطيه خالص هاني : هي المسابقة هتتقاس بالنظام الديمقراطي .... و الا بنظام الكتاب المقدس ؟؟ نانسي : مسابقة ايه يا أخي دلوقتي .... إنت عارف الكلام ده معناه إيه ؟ معناه إن انا و إنت مايبقلناش رأي في البيت ده خالص الأم : لأ يا حبيبتي ... إنتي ليكي رأي طبعاً الأب : كل واحد لازم يقول رأيه و بكل حرية .............. بس اللي هيمشي في الآخر رأيي أنا طبعاً هاني : يا سلام علي الديمقراطية يا بو هاني ... يا سلام نانسي : علي فكرة لازم تاخدوا بالكم إنه في الكتاب المقدس بيوصي الأباء زي ما بيوصي الأبناء بالظبط هاني : أه ... أنا بحاول أفتكر الموضوع ده من الصبح .... تقريبا الآية بتقول "ايها الأباء لا تنرفزوا " أبناءكم نانسي : لا تغيظوا ...يا فالح الأم : و هو فيه يعني أب أو أم هيحب يغيظ ولاده ؟؟... دا إحنا عايشين عشانكم هاني : ما احنا فاهمين ... بس أحياناً هو ده إللي بيحصل نانسي : احنا مش بنتغاظ بس ... دا إحنا بنبقي هنتفرس كمان الأب : أكيد الموضوع فيه إنَّ ... و انتوا اللي فاهمين غلط .... و الآية دي ليها تفسير تاني هاني : و اشمعني دي يعني اللي مفهومة غلط ... ما جايز يبقي الموضوع من أوله فاهمينه غلط كلنا الأب : خلاص ... باعتباري في السلطة الأعلي في البيت أخذت قرار بفتح مناقشة عن الموضوع ده ...ايه هو الترتيب السليم للسلطة ... موافقين ؟ الكل : موافقين
الانتساب
موضوع: السُلطة 
