توني يكتشف الصندوق السري توني يدخل المسرح و هو شارد الفكر ، ينظر بعيدا و يفكر مشغولا بمشكلة عميقة. يكون في الخلفية ديكور ماكينة مثل الة الزمنStarTrek مكتوب عليها الرمز " ل أ م هـ؟"(لماذا أنا موجود هنا) كوتش اهلا بيك يا توني ... ازيك النهاردة؟ (لا يتلقى رد) ازيك يا توني!( لا يتلقى رد) يا توني انت معايا ؟ توني اهلا يا كوتش ... اسف ما اخدتش بالي كوتش واضح انك مشغول بفكرة مهمة قوي .. قولي بتفكر في ايه؟ توني بافكر في السؤال اللي كنا بنتناقش فيه في مجموعتنا من شوية كوتش و ايه هو السؤال؟ توني سؤال صعب: ايه هي الحاجة اللي موجودة عندي لكنها مش ملك الله ؟ و الطريقة الوحيدة اللي ربنا ينفع يمتلكها بيها اني اقدمها له. كوتش ده سؤال مهم جدا .. انا متهيألي اننا هانكتشف الاجابة النهاردة .. بص على الماكينة ديه هاتساعدنا في اكتشاف الحل. توني ديه حاجة مدهشة جدا .. تطلع ايه الماكينة ديه؟ كوتش انت محتاج تستخدم خيالك شوية يا توني ... اكيد اتفرجت على افلام الخيال العلمي .. فجأة تلاقي الناس اتنقلوا من مكان للتاني بسرعة مذهلة بمجرد ما يقفوا قدام ماكينة تنقلهم زي ديه بالظبط .. يبقى كأنهم اختفوا فجأة من قدام الماكينة ويظهروا مرة تانية في مكان تاني. توني دي حاجة مدهشة يعني ممكن لو وقفت قدامها و شغلتها دلوقتي الاقي نفسي منطلق في الفضاء كوتش طبعا ده ممكن يحصل لو كان هدفك تروح للفضاء .. النهاردة عايزين نستخدم ديه عشان نكتشف سر مهم جدا .. السر ده مكتوب جوه الماكينة ديه لكنه مكتوب بشفرة معينة .. عارف ايه اللي مكتوب هنا ( يقرأ ل أ م هـ؟ "لماذا انا موجود هنا؟" توني "ل أ م هـ" حروف مش فاهم منها حاجة كوتش بص ركز كويس "ل" يعني ليه "أ" أنا و "م" موجود و"هـ" هنا ليه انا موجود هنا ؟ ده السؤال اللي عايزين نوصل لاجابته النهارده توني فهمتك .. لو احنا مش عارفين ليه احنا موجودين هنا .. ندخل جوه الالة ديه و نطير جوه مركبة فضاء و نقابل الكائنات الفضائية ونكتشف انها حطنا هنا على الأرض من ملايين السنين ونعرف منها احنا موجودين هنا ليه. كوتش توني انت عارف انه الكلام اللي بتقوله ده مش معقول ما فيش كائنات فضائية حطنا هنا على الأرض. توني انا متهيألي ان كلامك صح. كوتش الكلام ده ما فيهوش متهيألي .. الله هو اللي خلقنا هنا على الارض عشان فيه هدف لازم نوصل له ... ما فيش كائنات فضائية حطنا هنا على الأرض ... توني انت قصدك ان الله عنده اجابة عن سؤال "ليه احنا موجودين على الارض" كوتش مظبوط .. خلينا نستخدم الالة ديه عشان تساعدنا في اكتشاف سبب وجودنا هنا على الارض ... اول ما ندوس على الزرار ده و نكتب الكود بتاع النهاردة (مرقس 12 : 30 ) خلينا نشوف اذا كان ممكن نجاوب على سؤال احنا ليه موجودين على الارض يخرج كوتش اي جهاز صغير (ريموت كنترول او تليفون محمول) و يضغط على ازراره كأنه يدخل كود عندما يدخله تضاء الاضواء المركزة على الماكينة بصورة متقطعة ( يمكن اضافة بعض المؤثرات مثل دخان او اهتزاز الماكينة او موسيقى تعبر عن الترقب و السرعة) و يظهر بعد ذلك داخل الماكينة صندوق صغير "الصندوق السري" توني مش ممكن فيه صندوق ظهر جوه الالة .. هو ده الصندوق اللي ها يساعدنا نجاوب على سؤال "ليه أنا موجود هنا على الارض؟" كوتش انا متهيألي انه هايساعدنا على الاجابة أنا شايف مكتوب على الصندوق "الصندوق السري" يا ريت ده يا ساعدنا على حل اللغز .. عموما خلينا نفتحه و نشوف .. عندما يفتح كوتش الصندوق يخرج قصاصات ورقية في كل واحدة مفتاح من مفاتيح حل اللغز يقرأ كوتش على الاولاد كل اقصوصة واحدة تلو الاخرى و يتوقف عن القراءة اذا عرف الاولاد اي واحدة منهم ( الاجابة: العبادة) كوتش ـ الاجابة عن السؤال في كلمة واحدة ، لما بنعمل الكلمة ديه يبقى كأننا بنقول لله "احنا بنحبك يا رب" هي حاجة ينفع نعملها كل يوم و بنعملها بطريقة مخصوصة يوم الحد (الاحد)
ـ حاجة موجودة عندنا و ربنا ما يقدرش ياخدها مننا غير لو احنا قدمناها ليه. توني لحظة واحدة يا جناب كوتش ، انت عايز تقول ان الاجابة على سؤال "ليه انا موجود على الارض؟" عشان اعبد الله كوتش ايوة .. ده واحد من اهم الاهداف اللي ربنا عملها لحياتنا توني لكن لو ده كان هدف حياتي فده مش حاجة صعبة يعني اني اعملها ... انا باروح مدارس الاحد عشان اعبد الله لكن ده مجرد يوم من ايام الاسبوع كوتش لأ يا توني الموضوع لو كان بس اننا نروح الكنيسة مرة كل اسبوع فده كده مافيهوش اي اهمية العبادة اكتر من اننا نروح الكنيسة توني انا مش فاهم قصدك كوتش خلينا نشوف فيه ايه تاني جوه الصندوق السري ( يخرج كتاب مقدس علامته تشير إلى مر 12 : 30) ديه اكيد اية من الكتاب المقدس بتفهمنا يعني ايه عبادة ... الاية بتقول " تحب الرب الهك من كل قلبك و من كل نفسك و من من كل فكرك و من كل قدرتك" توني و هي ديه بقى العبادة ... انا متهيألي لسه ما فهمتش حاجة كوتش طيب تعال اشرح لك اكتر ايه هي العبادة ايه هو شكل العبادة حوار مع الاولاد كوتش انا محتاج واحد متطوع من الحاضرين قدامي ( يختار شخص و يدعوه معه على المسرح ويقدمه للجمهور) احنا النهاردة بنسأل (اسم الولد الواقف) " ليه موجود هنا على الارض؟" الله خلقه و وضعه وسطينا عشان هدف. (اسم الولد) مهم جدا لله عشان كده بعت ابنه الوحيد يسوع عشان يقدم حياته ل (اسم الولد) لما (اسم الشخص) يؤمن ان الرب يسوع قدم حياته عشانه، هايكون مليان محبة لله للدرجة اللي يعبده بيها في كل لحظة.. احنا بنعبد الله لما نوري له اد ايه بنحبه
(عندما يكمل كوتش الجزء المتبقي يستخدم اقصوصات ورقية على شكل قلب مكتوب على كل واحدة منها ما يوضح للجمهور المحبة من القلب و النفس و القدرة و الفكر و يفضل استخدام شريط لاصق على كل جزء حتى يتم لصقه على اجزاء جسم الولد)
خلينا نشوف دلوقتي ازاي (اسم الولد) يقدر يعبد الله بكل ما عنده و في الحالة ديه ها يعبد الله طول الاسبوع مش مجرد يوم واحد في الاسبوع . الكتاب المقدس بيقول " تحب الرب الهك من كل قلبك" و لنفترض انه هي ديه المحبة من كل القلب ( يلصق القلب المكتوب عليه من كل القلب في مكان القلب) القلب يعني المشاعر و الاشواق بتاعتك . ( اسم الولد) يقدر يحب الله من القلب لما يروح الكنيسة يوم الاحد و يرنم ويكلم الله ديه طريقة ينفع يقول بيها لله " انا باحبك" (يلصق قلب اخر مكتوب عليه من كل النفس على صدر الولد) الله كمان بيقول اننا لازم نحبه من كل النفس و نفسنا يعني الحاجات اللي بتحرك افكارنا و مشاعرنا ( اسم الشخص) اكيد في وقت من الاوقات كان عندك اسرار ما حدش يعرفها ، لكن محبتك لله من كل النفس تخليك تصلي له و تحكي عن كل اسرارك عشان تطلب من المسيح انه يتعامل مع كل اسرارك ( يلصق قلب على عقله مكتوب عليه من كل الفكر) محبة الله من كل الفكر معناها اننا لازم نفكر فيه و نتعلم اكتر عنه . ايه هو الكتاب اللي لازم تقراه عشان تتعلم عن الله ؟ الكتاب المقدس . تقدر تحب الله لما تقرا كلمته و تتعلمها . كل وقت تستخدم فيه فكرك في خدمة الله ديه طريقة تحب بيها الله من كل قلبك (يلصق اخر قلب على قمة ذراعة ناحية الكتف) و ايه معنى انك تحب الله من كل قدرتك؟ هل تقدر في وسائل تخدم بيها الله بجسمك ؟ هل في حاجات ينفع تقوم بيها في الكنيسة لما تستخدم قدرتك؟ و ايه اخبار الحاجات اللي تقدر تساعد بيها في البيت؟ ديه بعض الوسائل اللي ينفع تظهر بيها انك تحب الله من كل قدرتك محبة الله من كل القلب و النفس و الفكر و القدرة معناها تدي الله كل حاجة عندك هي دي العبادة لما تقدم الله كل شئ عندك لله . توني يكتشف هدفه توني ديه حاجة عظيمة جدا يا سيادة كوتش ، دلوقتي تسمح لي انط جوه الصندوق السري ده عشان انطلق و اروح المكان اللي جه منه كوتش عارف انت ممكن تعمل ايه ؟ انت تقدر تملا الصندوق ده حاجات و ترجعه تاني لاقوى مكان في الكون توني ازاي اعمل كده؟ كوتش لما تملاه بالحاجة اللي ربنا ما يقدرش ياخدها منك غير لما تقدمها له بنفسك توني ايوه فهمت قصدك العبادة كوتش مظبوط .. دلوقتي ايه معنى العبادة توني اننا موجودين هنا عشان نحب الله كوتش مظبوط يا توني لما نفتكر ازاي ربنا حبنا نقوم نظهر ليه احنا كمان اد ايه بنحبه توني مظبوط لما نحبه من كل القلب و النفس و ..... هي ايه كانت اللي وراها كوتش هو ايه اللي وراها يا ولاد ؟ ( الولاد يجيبوا : الفكر) توني ايوه الفكر و كمان لازم نحبه من كل .... ايه اللي وراها ؟ كوتش القدرة توني ايوه القدرة .... أنا كده عرفت انا ليه موجود هنا كوتش و ده هدف وجودي انا كمان توني و كمان في هدف كمان من وجودك هنا يا جلالة كوتش كوتش فعلا؟ هو ايه ده ؟ توني عشان تعزمني على حاجة اشربها كوتش انا موافق بس لو صليت توني انا عايز اصلي " يا رب انا عايز اشكرك عشان انت خلقتنا من اجل هدف معين ، اشكرك لأنك قدمت لينا ابنك يسوع عشان نعرف اد ايه انت بتحبنا و بالتالي نقدر نحبك من كل القلب و النفس و الفكر و القدرة ساعدنا اننا نعمل كده في اسم يسوع ... امين
الانتساب
موضوع: توني يكتشف الصندوق السري 
